نبشتہ چے یے؟
ندکار: شازیہ بلوچ ءُ
نبشتہ یک سرجمیں لبزانکی کارے کہ آئی ءِ تہ ءَ بنی آدم وت
ھیال، کلوہ ءُ پیگاماں گوں یک زبانے ءِ آباں لبزانکی دْروشم ءَ نبیسّ ایت ءُ پد ءَ دْرپ یا روان اش کنت۔ زُبان ءُ آئی ءِ گالواراں یک لبزانکی دْروشمے دیگ ءَ نبشتہ گْوش اَنت انچوشکہ:- کتاب، ھالتاک ءُ نمدیاں ھوار کارجاہ ءُ کارگِسے ءِ ایمیل ءُ ریپورٹنگ اَنت۔ البت مرچیگیں موبائل ءُ انٹرنیٹ ءِ زمانگ ءَ موبائل ٹیکسٹ میسج، شوشل میڈیائی پوسٹ ءُ تندجاھانی بے تاکی نبشتانک(Website' s paperless articles) ھم نبشتہ ءُ لبزانک ءَ شُمار اَنت۔
چوناھا نبشتہ یک انچیں لبزنکی کاریچے(A Process) کہ آئی ءِ تہ ءَ اشتاپ یک بلاھیں ردی ءُ نزوری یے زانگ بیت، بلکیں تو گْوش ئے اشتاپ یک ایبے۔ نبشتہ ءِ سے کاریچ اَنت انچوشکہ سَسّا، نبیسگ ءُ شونکاری۔ انی یک یکی ءَ ما شُمارا نبشتہ ءِ ھر سے ئیں کاریچ ءُ آیانی بِستار ءِ سر ءَ کمیں سرپدی دے ایں۔
سَسّا : بزانکہ نبشتہ کنگ ءَ پیسر ھیال ءُ جیڑگ، نبشتہ کار وت ءَ تچک کنت کہ من پرچا نبیس آں ءُ پہ وانوک ءِ سرپد کنگ ءَ من چے نبیس آں؟ نبشتہ ءِ مکسد، پائدگ ءُ سرھال چے بہ بیت؟ گِند ئے سَسّا نبشتہ کنگ ءِ بُنگیجی کاریچ اِنت کہ اے کاریچ ءَ نبشتہ کار وتی نبشتانک، نمدی ءُ کتابے ءِ وڑیں دِگہ چیزے ءِ نبیسگ ءَ پیسر نبشتہ ءِ مول ءُ مُرادانی بابت ءَ جیڑ ایت۔
نبیسّگ: نبشتہ ءِ دومی کاریچ ءَ نبشتہ کار وتی سَسّا ءِ رِد ءَ نبیسّ ایت۔ اے کاریچ ءِ تہ ءَ نبشتہ کار لبزانکی چیدگ ءُ بھرگانی سک ھیالداری کنان ءَ وتی گالرِداں شریں وڑے ءَ سنج دنت کہ وانوک تکانسر مہ بیت۔ ماں اے کاریچ ءَ نبشتہ کار وانوک ءِ سرپد کنگ ءِ جُھد کنت۔
شونکاری : نبشتہ ءِ سیمی ءُ گُڈی بھر ءَ نبشتہ کار وتی نبشتہ کُتگیں چیزاں وت وان ایت ءُ نبشتہ ءِ ردیاں راست کنت۔ اگاں چیزے بھرگ ءُ گالرِد ءِ نبیسگ ءَ بے ھیال بوتگ گُڑا پد ءَ آیاں ھم ھوار کنت۔ اگاں چیزے جزباتی بوتگ ءُ ماں زھر ءَ ھرابیں گپے چیزے نبشتہ ئِے کُتگ گُڑا ھرابیں گالاں ھم کَش ایت۔ راستی ءَ نبشتہ ءِ نازُرکین ءُ مستریں کاریچ ھم ایش اِنت کہ نبشتہ کاراں ماں اے کاریچ ءَ سک سِبر ءُ ھیالداری کنگ لوٹ ایت۔ اِے بابت ءَ بانُک ایما ھِل ءِ گُشتینے ھست، گْوش ایت "نبشتہ تئی سسا ءِ سیاہ ءُ اسپیت اَنت بلے شونکاری تئی سَسّا ءِ زیبائی اِنت“
پمیشکا گْوش اَنت مرچیگیں لبزانکی دور ءَ داں وھدیکہ یک نبشتہ کارے وتی نبشتہ ءِ سے ئیں کاریچاں رِد ءِ سر ءَ مہ کنت آ یک پوھیں نبشتہ کارے گْوشگ نہ بیت، ناپوھتیں نبشتہ کار نبشتہ ءِ اِے ھاسیں کاریچ ءَ ڈالچار کن اَنت البت پوھیں نبشتہ کار ایشی ءِ سر ءَ سک ھیالداری کن اَنت۔
انی ما وتی نبشتانک ءِ گُڈی بھر ءَ بلوچ نبشتہ کاراں سرپدی دیگ لوٹ ایں کہ مئے راجی زُبان بلوچی ماں وانگجاھاں وانینگ نہ بیت پمیشکا بلوچ نودربر ءُ وانِندہ بلوچی رَد نبیسّ اَنت، بلوچی زبان ءِ بازیں نبشتہ کار بے دَرونت ءُ بلوچی دربری (کورس) ءِ وانگ ءَ راجدوستی نبشتانک، کِسہ ءُ آزمانکانی نبیسّگ ءَ بے کساس ردی کن اَنت۔ اگاں ما وتی راجی زُبان ءِ شریں نبشتہ کار، جُھدکار ءُ سرمچار بوگ لوٹ ایں گُڑا باید اِنت ما چہ دُرستاں پیسر بلوچی دَرونتاں سرجمی ءَ بوان ایں، بلوچی رنگ گال(یں ءُ ئیں)، تپورگال(ءِ ءُ ءَ) ءُ کُمکّارگالاں دلگوش بہ کن ایں، چہ دَرونتانی وانگ ءَ پد نامداریں بلوچ نبشتہ کارانی زبان دوستی ءُ راجدوستی نبشتانک وانان کن ایں کہ سرپدی چہ وانگ ءَ رس ایت۔ ھچبر اشتاپ مہ کن ایں بلکیں نبیسّگ ءَ پد مُدام وتی نبشتگیناں دوبر وت ھم بوان ایں ءُ چمشانک بدے ایں کہ مئے نبشتگیں گالرِدانی توک ءَ ردی مہ بیت، پرچا کہ دُنیا ءِ تہ ءَ ھر زُبان ءِ اُستاد، نودربر ءُ نبشتہ کار وتی نبشتگیں چیزاں دو بر وت وان اَنت ءُ وتی بے ھیالی رَدیاں راست کن اَنت۔
چہ ایشی ءَ ھوار نبشتہ کاراں اِے (، ۔؟:!“/:";) لبزانکی چیدگ، ٹک ءُ نشان ماں راستیں جاھاں کارمرز کنگی اَنت کہ اِے لبزانکی چیدگ دُنیا ءِ ھر زُبان ءَ کارمرز بنت۔ اگاں ما اے لبزانکی چیدگاں سرپد نہ ایں گُڑا باید اِنت ما ایشاں بزان ایں۔ چوناھا ما اے لبزانکی چیدگاں چہ ھر وڑیں زبانے ءِ کتاب، ھالتاک ءُ نبشتانکاں ھم ھیل کُت کن ایں پرچا کہ توری دُنیا ءِ ھر وڑیں زبانے بہ بیت نبشتھی دْروشم دُرستینانی یک اَنت۔ چہ ایشی ءَ ابید ما گْوں شما دزبندی کن ایں کہ پہ بلوچی وانگ ءُ زانگ ءَ ھچبر بد مہ مار اِت، مُدام چہ بلوچ نبشتہ کاراں دبرگ ءِ جُھد بہ کن اِت، بلوچی درونتاں وانان ءَ وت ءَ راجی زبان ءِ نبشتہ کار جوڑ بہ کن اِت، بلوچی وت بہ وان اِت ءُ راج ءَ ھم بہ وانین اِت۔
بلوچ راج شالا زبان دوست، راجدوست ءُ یکمُشت بہ بات۔ پہ راجی زُبان ءِ دیمروی ءَ بلوچ راج ءِ وانِندہ، اُستاد ءُ نودربر وت ماں وت تپاک، ھمگام ءُ ھمکوپگ بہ بنت۔
دلگوش: ما راجی زبان ءِ جُھد ءَ اے مار اتگ کہ یک انچیں نبشتانکے تیار بہ کن ایں آ زِند ءِ ھر پِڑ ءَ بلوچ واِنندہ ءُ نودربراں پائدگ بہ دنت پمیشکا گوں شما دزبندی اِنت کہ مئے اِے نبشتانک ءَ دیم ءَ ھم روان بہ کن اِت کہ چہ ایشی ءِ وانگ ءَ راج ءَ ھم پائدگ بہ رس ایت۔